Қайырымдылық жәрмеңкесі

Наурыз мерекесі қарсаңында Өскемен экономика және техника колледжінде қайырымдылық жәрмеңкесі өтті.

Студенттер, оқытушылар және ата-аналар оның ұйымдастырылуына белсенді қатысты. Қонақтар түрлі тағамдар, қолөнер бұйымдары, кәдесыйлар және қатысушылардың өздері дайындаған ұлттық тағамдарды сатып алу мүмкіндігіне ие болды. Әсіресе, ата-аналардың үлесі зор болды: олар бұл бастаманы қуана қолдап, үйден пісірілген тәттілер, ұлттық қолөнер бұйымдары әкеліп, мерекелік дастарқанды безендіруге көмектесті.

Жәрмеңке жылы әрі достық атмосферасында өтті. Қонақтар дәмді тағамдар мен әдемі бұйымдардан ләззат алып қана қоймай, колледждің шығармашылық ұжымдары дайындаған ұлттық музыка, билер мен ойындар арқылы мерекелік көңіл-күйге бөленді.

Осындай қайырымдылық акциялары адамдарды біріктіріп қана қоймай, студенттердің бойында мейірімділік, өзара көмек және бірлікті тәрбиелейді. Биыл жиналған барлық қаражат «Өскемен қаласының мамандандырылған балалар үйі» КММ қажетті заттарды сатып алуға бағытталады, бұл балаларға қолдау көрсетіп, мереке қарсаңында қуаныш сыйлауға мүмкіндік береді.